katnagaraza

„Радиус Архитекти“ со најдобро решение на Конкурсот за изградба на катна гаража во Охрид

Охрид, 17. февруари 2017 (ОХРИДПРЕС) – По двата неуспешни обиди за избор на идејно решение, Акционерското друштво за изградба и стопанисување со станбен и деловен простор (АДСДП) избра победник на Конкурсот за изградба на првата катна гаража во Охрид.

Архитектонскиот труд на „Радиус Архитекти“ од Скопје е избран за најсоодветен за решавање на проблемот со паркирање кај Центарот за култура „Глигор Прличев“ во центарот на Охрид, пренесува Build.mk.

Архитектите од ова биро се стекнаа со првата награда во висина од 150.000 денари. Второнаграден со 100.000 денари е пристигнатиот труд од „Вектор 90 Томе“ од Струмица, додека третата награда од 50.000 денари од страна на жирито му е доделена на архитектонското биро „Лелелеле“ од Скопје.

На конкурсот биле поднесени вкупно пет идејни решенија. АДСДП доделило и два откупи за трудовите на фабриката „Карпош АД“ од Скопје и на групата архитекти – Митко Хаџи-Пуља, Бетим Зеќири и Никола Стрезовски. Како следна фаза од реализација на проектот, акционерското друштво треба да го подготви основниот проект за објектот.

Засега нема информации колку ќе чини реализацијата на проектот. Иако првично беше замислено објектот да се гради од локалната самоуправа, АДСДП се одлучи да ја преземе улогата на инвеститор. Катната гаража кај Центарот за култура „Глигор Прличев“ ќе има приземје и четири ката и ќе се простира на површина од 4.500 метри квадратни. (Крај)

извор: Build.mk фото: архива