sdsmstabohrid

СДСМ: Бакрачески и ВМРО-ДПМНЕ го претворија Охрид во панаѓур на кичот и гласната музика

Охрид, 15. јули 2017 (ОХРИДПРЕС) – И оваа летна сезона во Охрид минува низ истиот хаос и деорганизација како и во изминатите четири години под владеење на ВМРО-ДПМНЕ. Сепак, годинава хаосот, нередот и метежот, се уште поочигледни и поголеми бидејќи локалната власт не донесе летен сообраќаен режим со кој ќе се регулира сообраќајот во стариот дел од градот, реагираат од ОО на СДСМ од Охрид.

– Поради тоа, стариот дел од градот се соочува со невиден метеж и застој во сообраќајот. Наместо автентичниот дел од градот да биде пријатно место за уживање и прошетка за туристите, слично како и претходните години, тој претставува целосно нефункционален дел од Охрид. Автомобилите се паркираат на пешачки зони, по тротоари и на улица, а граѓаните и туристите постојано се изложени на потенцијална опасност од сообраќајот кој во овој период не смее да се одвива во стариот дел на градот или истиот треба да биде строго ограничен. И покрај бројните апели на туристите и граѓаните на Охрид, Никола Бакрачески и локалната власт се уште ја игнорираат ваквата грда слика на македонскиот туристички бисер. Дополнително, туристите и граѓаните се соочуваат со катастрофална патна инфраструктура до и во градот, како и преполни контејнери со ѓубре кои Комуналец не ги празни редовно или пак тоа го прави за време на сообраќајниот шпиц, стои во соопштението.

Од СДСМ потсетуваат дека кога Бакрачески ја презеде власта во Охрид, ветуваше дека од Охрид ќе направи претпознатливо монденско место.

– Денес, четири години подоцна, локалната власт предводена од Бакрачески е заинтересирана само за продажба на општински парцели по багателна цена, додека во Охрид се случува хаос и неорганизираност. Наместо град на културата, Бакрачески и ВМРО-ДПМНЕ го претворија Охрид во панаѓур на кичот и гласната музика од која до раните утрински часови без сон остануваат и охриѓани и туристите. Охрид и граѓаните не заслужуваат ваква локална власт која мисли само на сопствените интереси додека градот се гуши во смет и сообраќаен метеж. Затоа, веќе оваа есен, граѓаните на Охрид ќе ги добијат промените кои ги заслужуваат. Новата локална власт предводена од СДСМ ќе го врати сјајот на Охрид, ќе направи темелна ревизија на досегашната работа на локалната власт, а за секоја активност спротивна на законот ќе мора да има одговорност, реагираат од ОО на СДСМ од Охрид.

opstinaohridsologoСо реакција се јавија од Општина Охрид. Во неа стои дека соопштението на СДСМ е полно со паушализам, неточни и непроверени информации, начин на работа кој што е препознатлив белег на СДСМ Охрид.

– Веројатно многу е посилна потребата да се прикрие сопствената немоќ за преземање на централната власт,  а со тоа и преземање на одговорноста пред граѓаните, што мораат вака преку брзоплети соопштенија да се обидуваат да ја дефокусираат јавноста. Охриѓани знаат дека познавањето на законите и ингеренциите им се слаба страна но овој пат се надминаа себе си: ги критикуваат состојбите на сообраќајот кои се директна и единствена надлежност на СВР Охрид која сега веќе е предводена од кадри на СДСМ. Сообраќајниот режим е доставен до СВР Охрид која е единствена надлежна институција да се грижи и да ги санкционира сите оние кои истиот го прекршуваат. Иако мислите дека граѓаните го заборавиле Вашето владеење со Охрид и поставувањето на тезги и диви шанкови на секое ќоше од градот, очигледно многу се лажете и живеете во заблуда. За разлика од Вас оваа локална самоуправа превзема директни координирани акции против сите оние кои се обидуваат на диво да постават тезги обидувајќи се во целост да ја спроведе зацртаната програма за поставување на  урбана опрема, реагираат од Општина Охрид.

Во дописот се додава дека „шампионите за губење на земјиште низ чудни и нетранспарентни постапки, сето тоа надополнето со чудни постапки за експропријација си дозволуваат да зборуваат за некој друг. Тоа се истите оние кои Охрид го оставија без земјиштето кај старата автобуска станица, просторот кај градскиот полигон, зградата од старото училиште Св. Сава и многу други. А многу добро знаат дека постои само еден факт: оваа локална самоуправа спровела само три постапки за отуѓување на градежно земјиште на кое се гради новата автобуска станица, при крај е постапката за почнување на градба на старечкиот дом, а третата парцела е продадена по историски највисока цена од сите аукции за продажба на земјиште во Република Македонија“.

– Кога веќе сме кај фактите и за чистотата во градот срамота е да се обидува некој да ја критикува оваа локална самоуправа која единствена го поднови возниот парк на ЈП Охридски комуналец со нови возила и континуирано вложува во изградба и поставување на контињери насекаде во градот. Незаборавајте дека од Вашето владеење со Охрид спомен е депонијата Мауцкер, а главна реформа пропратена со силна медиумска кампања беше поставувањето на пластични кеси низ јавните површини во градот. Убаво е и сакаме да се прави ревизија на секое работење и  немаме ништо против таа да биде или домашна или меѓународна. Но претходно е добро да ги прочитате ревизорските извештаи за периодот кога вие го водевте Охрид и да се уверите што се сте правеле на штета на граѓаните на Охрид, реагираат од Општина Охрид. (Крај)

извор: ОхридПрес фото: архива