Охрид, 1. декември 2021 (ОХРИДПРЕС) – Од денеска стапува на сила забраната за употреба на пластични кеси, а ќе бидат дозволени само биоразградливи кеси.

Иминатиов период кесите ги плаќавме по денар или два, а во некои маркети беа и бесплатни. Охридските маркети подготвени ја пречекаа мерката и навремено ги известија купувачите за деталите.

– Врз основа на член 10 од законот за управување со пакување и отпад од пакување, почнувајќи од 1-ви декември 2021 година биоразградливите кеси за носење на стока согласно пропишаните стандарди за биоразградливост, а врз основа на став 4 од член 10, на Законот за управување со пакување и отпад од пакување, потрошувачите се обврзани да плаќаат надоместок од 15 денари за парче, сума која ќе се префрла на посебна сметка на министерството, порачаа од „Тамаро“ маркетите.

Од денеска ќе биде дозволена продажба само на биоразградливи кеси по цена од 15 денари. За средствата од продадените пластични кеси трговците ќе мора да водат евиденција по квартали, а надоместоците ќе треба да ги уплаќаат на посебна сметка на органот за животна средина. Почнувајќи од денес угостителските објекти нема да имаат право да продаваат храна во пластични еднократни пакувања во заштитените природни подрачја. (Крај)

извор: ОхридПрес фото: архива