Скопје/Охрид, 18. август 2024 (ОХРИДПРЕС) – Во текот на вчерашниот ден, до 19:00 часот имало вкупно 38 пожари на отворен простор, од кои во моментов 16 се активни, 6 се под контрола и 16 се изгаснати, објавија од Центарот за управување со кризи (ЦУК).
Според истиот извор, во регионот на Општина Ресен и Општина Охрид, активен е пожарот на планината Галичица.
– На исток гори во правец на селата Лескоец и Стење, општина Ресен, додека на Охридска територија на запад кон месноста „Војтино“ и на север кон планинарска куќа. Гори нискостеблеста вегетација и букова шума, информираат од ЦУК.
Командирот на Територијалната противпожарна единица (ТППЕ) Охрид Борко Јанкулоски, вчера, во изјава за Супер радио и OhridPress истакна дека вчера имале позитивен ден и дека пожарот веќе на места се контролира.
– Остануваат само одредени локации, кои се тешко достапни и на кои може да се пристапи само со помош на летала од воздух, изјави Јанкулоски.
Тој потенцира дека вчера, уште од раните утрински часови се делувало на потегот кај „Војтино“, каде во текот на денот се интервенирало на 5 до 6 жаришта, со околу 30 професионални пожарникари.
– Нашите пожарникари интервенираа заедно со Доброволното противпожарно друштво „Повардарец“ од Неготино и Доброволното противпожарно друштво „Ентузијаст“ Охрид и Дебрца, како и со останати волонтери со логистичка поддршка од погранична полиција, вработени во НП „Галичица“ и останати лица и служби. Имавме и поддршка од воздух на тешко пристапните локации, а со механизација е успешно направен и појас за да се спречи ширење на пожарот, изјави Јанкулоски.
Тој упати и голема благодарност до волонтерите кои помагаа денеска, како и до сите кои биле вклучени во гасењето на пожарите на овој дел на планината.
Јанкуловски напомена и дека имаат и редовна координација и комуникација со албанската страна каде во моментов е поголемиот дел од пожарот и дека сите напори се да се спречи да слезе пожарот во селото Љубаништа.
Последните снимни (од 11:13 часот на 18.08.2024 година) на системот NASA FIRMS од пожарот на планината Галичица кој трае полни две недели покажуваат дека истиот се’ уште зафаќа голем регион, но дека е намален на македонска во однос на страната која гори во соседна Албанија. (Крај)
извор: ОхридПрес фото: ОхридПрес
