Избор Охрид Празници

Во Лагадин се одбележа големиот православен празник „Вера, Љуба, Нада и Софија“

Охрид, 30. септември 2018 (ОХРИДПРЕС) – Православните верници од Охрид и годинава го одбележаа големиот христијански празник „Свети маченички Вера, Љуба, Нада и Софија“ во малата црква во туристичката населба Лагадин.

Како што појаснува ктиторот на овој мал верски објект Љупчо Патчев, како и секоја година, и овојпат, средствата што ќе ги остават верниците, ќе бидат наменети во хуманитарни цели.

Патчев ја изгради малата црква пред 18 години, по повод одбележувањето 2000 години од христијанството. Секоја година на овој ден, верниците палат свеќи оддавајќи почит кон четирите маченички и молејќи се за здравје и благосотостојба на нивните блиски.

Трите сестри Љубов, Вера и Надеж и нивната мајка Софија заради својата вера и љубов кон Христа биле погубени. Тие живееле во првата половина на вториот век по Христос за време на владеењето на императорот Хадријан. Во овој период врз христијаните биле вршени големи прогони. Таа судбина ги снашло и Софија и нејзините три ќерки Љубов, Вера и Надеж. Биле измачувани затоа што одбиле да принесат жртви пред идолот на Артемида. Трите сестри биле измачувани пред очите на нивната мајка за потоа да им бидат отсечени главите.

Мајката Софија ги погребала телата на своите три ќерки и откако поминала три дена и ноќи во молитви над нивниот гроб, го предала својот дух на Бога. (Крај)

извор: ОхридПрес фото: Митко Лукан