ИЗБОР НА УРЕДНИКОТ ОБРАЗОВАНИЕ Охрид ТОП ВЕСТИ

123 ученици отпочнаа да следат настава со физичко присуство во ООУ „Ванчо Николески“

Охрид, 1. октомври 2020 (ОХРИДПРЕС) – ООУ „Ванчо Николески“ денес ги отвори вратите за вкупно 123 ученици кои ќе отпочнат да следат настава со физичко присуство во централното и подрачните училишта во учебната 2020/21 година.

Во училиштето во Лескоец и во подрачната паралелка во Ливоишта настава со физичко присуство ќе следат учениците од I до III одделение, додека во подрачните училишта во Косел и Куратица настава со физичко присуство ќе следат сите ученици од I до IX одделение.

Image may contain: one or more people, people sitting, table and indoor

Вработените во училиштето во претходниот период ги направија сите потребни подготовки за безбедно отпочнување на наставата во сите објекти. За првачињата во сите училишни згради беше организирана свечена приредба, со почитување на Протоколите за заштита од COVID-19. На приредбите настапија учениците од погорните одделенија кои преку песнички и пораки им посакаа добредојде на најмалите ученици, со желби за здравје и успех во стекнување на нови знаења во училиштето, но и многу другарување.

Image may contain: one or more people and people standing

Првачињата во Лескоец со свечен говор ги поздрави директорката на училиштето, Елена Ел Нади.

-Почетокот на оваа ваша прва учебна година е малку поразличен од претходните години. Сите активности што ги направивте пред да влезете и откако влеговте во училиштето ќе ги практикувате секојдневно, но кога знаеме дека тоа е важно за вашето здравје, здравјето на вашите родители, братчиња и сестричиња, баба и дедо, вашите наставнички, другарчиња и сите околу нас, не треба да ни биде тешко. Оваа ситуација нема да биде препрека вие да зачекорите по вашата животна патека. Вашите наставнички ќе ве понесат по патот на знаењето и ќе чекорат заедно со вас, ќе ви даваат поддршка, ќе ве храбрат кога ќе ви биде тешко и ќе се радуваат на вашите успеси заедно со вас и вашите родители. Во училиштето ќе стекнувате знаења кои се основа за вашиот успех, но уште поважно е дека во ова училиште ќе ги негувате вистинските човечки вредности, ќе се почитувате меѓусебе, ќе си помагате, бидејќи наша цел е да бидете силни личности со позитивни особини, спремни за новите предизвици, истакна директорката Елена Ел Нади.

Image may contain: one or more people, people standing and indoor

Наставата во ова училиште денес ја започнаа и останатите ученици од IV до IX одделение од Лескоец, кои со своите одделенски наставници го одржаа својот прв онлајн час. Тие оваа учебна година ја започнуваат со учење од далечина.

Image may contain: 1 person, table and indoor

Image may contain: one or more people, people standing, drink and indoor

-Ние како училиште сме спремни, организирани, секојдневно ги надминуваме новите предизвици почитувајќи ги препораките за реализација на наставата во време на пандемија со COVID-19, па затоа сметаме дека новите околности нема да бидат препрека учениците да добијат квалитетна и безбедна настава во учебната 2020/21 година, порачуваат од училиштето. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука