Избор Македонија ОБРАЗОВАНИЕ ТОП ВЕСТИ

Учениците од четврток на распуст, предлози за нацрт-концепцијата до 20-ти јанаури

Скопје, 28. декември 2020 (ОХРИДПРЕС) – Основците и средношколците од четврток, 31-ви декември, ќе бидат на зимски распуст кој ќе трае до 20-ти јануари.

Согласно со измените на Календарот за организација на работата на училиштата (основни и средни), првото полугодие оваа учебна година почна еден месец подоцна, односно на 1-ви октомври, а бројот на наставни денови е намален од 180 на 159.

Зимскиот распуст е во период како и во минатите години и, иако имаше барања, не беше предвремен затоа што повеќето од вкупниот број ученици во земјава наставата ја следат онлајн, а кај оние со физичко присуство, како што информираше МОН, заразени ученици и наставници има под 1 процент и училиштата не се преносители на вирусот.

Додека учениците ќе бидат на распуст, наставниот кадар и сите засегнати ќе имаат можност до 20 јануари да праќаат коментари, предлози и сугестии за Нацрт-концепцијата за основното образование.

Документот на 48 страници е поставен на веб-страницата на Министерството за образование и наука кое концепцијата ја презентираше во средата. Нацрт-верзијата е објавена на пет јазици: македонски, албански, турски, босански и српски.

За унапредување на содржината на документот,, сугестиите и предлозите до 20-ти идниот месец треба да се праќаат на електронската адреса: koncepcija@mon.gov.mk. (Крај)

извор: Сител фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука