Охрид, 25. ноември 2021 (ОХРИДПРЕС) – Охридското Езеро го достигна минимално дозволеното ниво, откако речиси една недела беше на сантиметар над минимумот.

Според денешните мерења на Управата за хидрометеоролошки работи на Република Македонија (УХМР), водата е на кота од 693,10 м.н.в, што е пак за 16 сантиметри под просечното ниво за овој месец (693,26 м.н.в).

Температурата на езерската вода, измерена утрово е 12,5 степени, што е за 0,3 степени пониска од просекот за овој период од годината.

Билјанините извори, една од најпрепознатливите локации во градот под Самуиловата тврдина, над два месеци се без вода.

Алармантната состојба во која се наоѓа Охридското Езеро, идентична како сегашната, ни се повторува по една година. Ваков случај имавме и минатиот ноември, кога водостојот „падна“ и на 693,10 м.н.в, а речиси пола декември беше на еден сантиметар под минимално дозволеното ниво.

Ноември 2020 година

Ноември 2021 година

Во 2017 година езерското ниво се соочуваше со ваква слична состојба на низок водостој, за во 2018 година состојбата да биде дијаметрално спротивна, водостојот на езерото беше драстично повисок од дозволениот максиум (693,75 м.н.в.) кога достигна ниво и од 694,03 м.н.в.

Во Охрид денес претежно облачно време. Ќе дува слаб до умерен ветер од југоисточен правец.

Mаксималната температура во Охрид ќе се искачи до 10. степени.

– Под влијание на влажен бран од утре ќе преовладува променливо облачно време со повремени врнежи од дожд, на места пообилни, особено во западните делови. На повисоките планини врнежите повремено ќе преминуваат во снег. Ќе дува умерен до засилен ветер од јужен правец, кој во деновите од викендот ќе услови повисоки дневни температури, информираат од УХМР. (Крај)

извор: ОхридПрес фото: ОхридПрес/УХМР