Новата кула на Саграда фамилија блесна со украсна ѕвезда

Барселона, 9. декември 2021 (ОХРИДПРЕС) – Со поставување сјајна ѕвезда, вчера беше откриена нова кула висока 138 метри на базиликата Саграда фамилија – најпознатата зграда во Барселона, која е изградена во 19 век од каталонскиот архитект Антонио Гауди.

Неколку илјади луѓе, и покрај студеното и ветровито време, гледаа како кранот ја поставува ѕвездата од 5,5 тони на кулата посветена на Богородица. Надбискупот од Барселона ја благослови кулата, прва отворена по 45 години. Таа е втора највисока од 18-те кули. Највисоката е посветена на Исус, четири – на евангелистите, а другите 12 кули ги претставуваат апостолите. Целата базилика би можела да биде завршена до 2032 година, на 150-годишнината од поставувањето на првиот камен, предаден од епископот Хозе Марија Уркинаона на 19 март 1882 година.

Саграда фамилија е една од најпосетуваните згради во Шпанија. Во неа се наоѓа гробот на Гауди. Ѕвездата поставена на врвот на кулата е изработена од не’рѓосувачки челик, а пред инсталацијата беше тестиранa и нејзината издржливост, што вклучуваше удирање со тешки предмети при голема брзина. По поставувањето на ѕвездата, се служеше миса, а беше објавена и порака од папата Франциск кој потсети на сиромашните, болните, заразените со коронавирус и изнемоштените.

Папата рече дека сјајот на ѕвездата е „синодален пат што треба да се следи во Барселона и го повика градот – особено одговорните, да не ги забораваат сиромашните и исклучените“ (од општеството). Во Барселона по повод отворањето на кулата до 4-ти јануари ќе се одржуваат различни настани, кои вклучуваат пеење божиќни песни, конференции, изложби и народни танци. (Крај)

извор: Опсервер фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука