Мицкоски: Во Охрид се случува градежна офанзива, му честитам на Пецаков и неговиот тим

Орхид, 7. мај 2022 (ОХРИДПРЕС) – Денеска сме во Охрид, продолжуваме насекаде низ Македонија онаму каде што се работи, каде што градоначалниците на ВМРО-ДПМНЕ и коалицијата работат, за разлика од овие од владата на СДСМ и ДУИ кои што крадат, порача денеска од Охрид првиот човек на ВМРО-ДПМНЕ Христијан Мицкоски.

– Тоа е една голема и суштинска разлика која што граѓаните ја направија на локалните избори, а убеден сум дека таа разлика ќе ја направат и на следните предвремени парламентарни избори кои што многу брзо ќе се случат. Од она што можам да го заклучам и видам од досега со градоначалникот Пецаков што разговаравме, но и што го видовме на лице место после пет месеци повторно Охрид започнува да се гради, да се движат работите и ќе продолжи во таа насока. Иако беше изминатиот период некако сето замрено и стопирано низ цела Македонија, вклучително и Охрид, сега од ова што можам да го видам овде градежната офанзива е дел од Охрид и проектите овде во Охрид. Јас ја користам оваа прилика да им честитам и нему и неговиот тим од луѓе кои што се овде и сето тоа го работат, и да ги охрабрам уште позасилено да продолжат да работата во периодот кој што следи. Знам дека можеби ќе биде малку посложено бидејќи доаѓаат месеците кога започнува туристичката сезона овде во Охрид, но пред и после тоа треба уште поинтензивно да им покажеме на граѓаните дека ние сме различни, што впрочем тоа и го покажува Пецаков и луѓето кои што се дел од неговиот тим овде во општината, истакна Мицкоски.

Тој напомена дека е задоволен од тоа што го гледа низ Македонија, низ градовите и истакна дека каде што се градоначалниците од ВМРО-ДПМНЕ и коалицијата е задоволен од реализираното, бидејќи се направила разлика, а тоа го гледал и на анкетите, тоа го гледал и во бројките, тоа е практично онаа повратна информација која што ја добивале од граѓаните на 5-6 месеци од завршувањето на локалните избори.

– Многу беше важно каков е првиот впечаток и можам да кажам дека во сите оние општини каде што имаме градоначалници од ВМРО-ДПМНЕ и коалицијата впечатокот е навистина позитивен и многу подобар од колку тој кој што беше пред да се случат локалните избори, бидејќи знаете немате можност за прв впечаток втор пат да оставите. Така што тука би завршил, одлично е ова што се работи и ги охрабрувам така да продолжат и во иднина во периодот кој што следи, порача Мицкоски од Охрид. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука