Економија Избор Македонија Охрид ТОП ВЕСТИ Туризам

Петкоска: Со избрзани законски решенија, власта ги направи туристичките места неатрактивни викенд дестинации

Скопје/Охрид, 11. мај 2022 (ОХРИДПРЕС) – Случувањата на вчерашната пленарна седница се најдобар сведок за дволичноста на власта која со избрзаните законски решенија, туристичките места ги направи неатрактивни викенд дестинации, изјави Лидија Петкоска, пратеничка од Охрид во редовите на ВМРО-ДПМНЕ.

– Имено, на 18-ти април пратеничката група на ВМРО-ДПМНЕ поднесе Предлог закон за дополнување на Законот за трговија по скратена постапка, со кој побаравме туристичките места да можат да работат и во недела. Овој наш предлог вчера беше одбиен само затоа што на 9ти мај колегите од мнозинството поднеле идентичен закон, со идентична цел но наместо ползата што граѓаните ќе ја имаат од законското решение, побитно им било кој ќе биде предлагачот, рече таа.

Петкоска посочи дека затоа што можат повеќе, од власта после само неколку месеци од влегувањето во сила на законот што самите го составиле и брзоплето го изгласале, следува уште еден апсурд, а тоа е фактот што сега предлагаат 2% од вкупниот приход остварен во претходната година, наместо да бидат наменети за инвестирање во детски градинки, да се наменат за некаков Фонд за развој и човечки капитал.

– Сите ги знаеме нивните фондови и сите знаеме што сторија со човечкиот капитал, кој моментално на огромна жал на сите нас, се наоѓа во далечната Германија, Швајцарија, Хрватска, па и секаде – само што подалеку од оваа власт! Со ваквото однесување, власта не го закочи само Собранието, туку ги закочи и Охрид и Струга и целокупниот туристички и економски развој на државата, од која еден по еден, ги избрка сите млади луѓе, истакна Петкоска.

Таа потенцира дека Пратеничката група на ВМРО-ДПМНЕ смета дека Предлог законот за измена на Законот за трговија мора што побрзо да се донесе, без оглед кој е предлагачот, затоа што пред сè, е во полза на туристичкиот и економскиот развој. (Крај)

извор: vecer.mk фото: vecer.mk

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука