Бочварски-Рустеми: Рокот за изградба на автопатот Кичево-Охрид мора да се запази, едната лента од делницата Требениште-Охрид ќе се пушти за сообраќај во август
Охрид, 19. мај 2022 (ОХРИДПРЕС) – Автопатската делница од Кичево до Охрид е врвен приоритет и не прифаќам никакво пролонгирање, нема повеќе калкулации и рокот мора да биде испочитуван, истакна министерот Бочварски кој денеска заедно со заменик министерот за транспорт и врски Беким Реџепи и директорот на ЈП за државни патишта Ејуп Рустеми, извршија увид во градежните активности на Поделница 5 од автопатот Кичево-Охрид, кај населеното место Горенци.
Тој информираше дека изградбата се одвива со силно темпо. Моментално на терен работат повеќе од 700 работници, со преку 280 градежни машини, а вкупниот прогрес на автопатот до овој момент изнесува 70 проценти.
– Од состојба која ја наследивме, која беше катастрофална, денеска имаме јасна слика. Автопатот остана приоритет и сега се одвиваат асфалтерски работи што се завршни работи во изградбата. Денеска ќе се вградат 320 тони асфалт прв слој, а веќе од утре се засилуваат асфалтерските работи каде ќе се вградуваат и по 900 тони асфалт дневно. Како што не информира Надзорот, очекуваме десната лента од Требениште кон Охрид да биде комплетно завршена и пуштена за сообраќај на почетокот на месец август, додека левата лента ќе биде завршена и пуштена во сообраќај до крај на оваа година, изјави министерот за транспорт и врски, Благој Бочварски.
Комплетно е завршено препроектирањето на 25% од трасата, инфраструктурните проекти се одобрени од Министерството за транспорт и врски и компаниите имаат чист терен за работа. Градежната механизација е распоредена на секоја позиција од Кичево до Охрид, додаде министерот Бочварски.
Директорот на ЈП за државни патишта, Ејуп Рустеми, истакна дека покрај овие 57 километри автопат се градат и уште дополнителни 30 километри пристапни патишта.
– На денешниот увид со министерот Бочварски констатиравме дека 95% од трасата на автопатот Кичево – Охрид е пробиена. Се сретнавме со изведувачот, динамиката на изградба тече со силно темпо. Се работи на изградбата на голем број вијадукти, на неколку клучки, паралелно и на алтернативните и пристапни патишта, а исто така активно се работи и на тунелот чиј прогрес во овој момент изнесува 95%, изјави директорот Рустеми.
Вредноста на изградбата на овој автопат е 598 милиони евра, според рокот предвиден до Договорот со изведувачот, тој треба да се заврши до декември 2023 година. Оваа автопатска делница е дел од Коридорот 8, стратешки коридор за кој што Владата е силно посветена на неговата доизградба и модернизација. (Крај)
извор: ОхридПрес фото: архива
@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |