Здравје ИЗБОР НА УРЕДНИКОТ Македонија Охрид Ретки болести 2022 ТОП ВЕСТИ

15 дена до стартот на 5. Сезона на Националната кампања „Ги запознаваме ретките болести“

Охрид, 18. јануари 2023 (ОХРИДПРЕС) – Ретките не се невидливи. Денеска сме на 15 дена од почетокот на годинешното, јубилејно, 5-то издание на Националната кампања „Ги запознаваме ретките болести“, порачуваат од Здружението „Ретко е да си редок“ како најава за годинешното, јубилејно издание на кампањата.

– Оваа година кампањата ја посветивме на оние кои се полни пет години со нас, кои се нашиот ветер во грб и нашата најсилна поддршка. Здравствени работници, Ви благодариме за вложувањето во кампањите, без Вас немаше да успееме. Продолжуваме заеднички да ги менуваме работите на подобро, порача првиот човек на „Ретко е да си редок“ Гордана Лолеска.

Додава дека овој февруари е повторно редок, како болеста која можеби ја има човекот кој седи до Вас во ресторан, како детенцето кое си игра со вашето дете, а вие ништо не знаете за неговата понекогаш ретка и „невидлива“ попреченост.

– Време е за 28 дена во февруари со 28 ретки дијагнози. 5-та сезона од Националната кампања „Ги запознаваме ретките болести 2023“, повторно е изработена на македонски и на албански јазик и е веќе комплетно подготвена, потенцира Лолеска.

Таа испраќа огромна благодарност и до сите медиуми ширум државата кои и оваа година застанаа зад ретките и докажаа дека се сериозен и верен партнер во оваа „борба“ за видливост и правата на лицата со ретки болести и нивните семејства.

– Започнуваме на 1-ви февруари. Многу сме! Ретки сме! Силни сме! Ви го претставуваме најавното видео и боите кои ќе ја обојат кампањата оваа година, вели Лолеска.

Првиот ден на ретки болести беше одбележан во 2008 година, точно на 29-ти февруари, „редок“ датум кој се случува само еднаш на секои четири години. Од тогаш, Денот на ретки болести се одржува секоја година на последниот ден од февруари, месец познат по тоа што има „редок“ број на денови. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука