Избор Охрид

Сојузот на охридските борци со честитка по повод 11 Октомври

Охрид, 10. октомври 2016 (ОХРИДПРЕС) – 11 Октомври 1941 година претставува врвен израз и логичен продолжеток на револуционерните и слободарски традиции на македонскиот народ, изразени на сите претходни востанија во минатите векови и децении, вели од името на Сојузот на борците на општините Охрид и Дебрца, претседателот на сојузот, Гоце Георгиески.

– Македонскиот народ во тие судбоносни моменти се определи за борба против ропството, против фашизмот – заедно со светската антифашистичка коалиција, борба за остварувањето на вековниот сон за национална слобода и своја држава. Учеството во вооруженото востание во Народноослободителната борба беше револуционерен и патриотски долг на сите слободољубиви сили. Најнапредните интелектуалци, работници, селани, ја прифатија таа определба и затоа народноослободителната борба во Македонија имаше масовен карактер и се случи војската да биде народ, а народот беше војска, дополнуваат охридските борци во честитката до сите граѓани на Република Македонија.

Додаваат дека од Народноослободителната војна израсна грандиозното АСНОМ-ско дело, слободната македонска држава. На Првото заседание на АСНОМ, се случи и вториот слободарски и победоносен Илинден, се реализираа вековните стремежи на македонскиот народ за добивање национална и социјална слобода.

– Прославувајќи го овој ден и сеќавајќи се на жртвите, ние со почит и благодарност се поклонуваме пред ваквата борба и пред олтарот на сите паднати борци за слободна и самостојна Македонија. Со оваа борба нашиот народ на најдобар можен начин го докажа својот државотворен капацитет и право на изградба на самостојна, суверена и слободна држава. Нека ни е честит и вековит 11 Октомври, Денот на народното востание на Македонија и Денот на борецот, се вели во продолжението на честитката. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука