Ќе добие ли Охрид лиценца за испитен центар?

Охрид, 27. јануари 2018 (ОХРИДПРЕС) – Охрид е меѓу градовите за кои МВР распиша конкурс за избор на правни лица за добивање лиценци за испитни центри.

Минималниот број на испитни комисии за подрачјето на испитниот центар во Охрид, со испитно место во Охрид и подружници и испитни места во Струга, Кичево и Дебар изнесува најмалку две испитни комисии со пријавни места во Охрид, Струга,Кичево и Дебар.

Изборот на правно лица кое ќе ја добие лиценцата ќе се изврши од пријавените учесници на јавниот конкурс кои ги исполнуваат условите. Проверката ќе ја врши Комисија на Министерството за внатрешни работи формирана согласно член 50 став (2) од Правилникот за начинот на спроведување на возачките испити и поблиските критериуми во однос на просторните услови и материјално-техничката и информатичката опрема на испитните центри и водењето на евиденциите во врска со спроведените возачки испити, како и начинот на издавање и одземање на лиценца за испитен центар, формата и содржината на образецот на лиценцата за испитен центар.

Моментално за организирање и спроведување на возачки испит за кандидатите, надлежен е испитниот центар „АМД Кичево – Испитува“, кој го покрива регионот на СВР Охрид.

Конкурсот кој беше распишан пред крајот на минатата година е веќе завршен, а покрај Охрид беа опфатени и градовите Куманово, Тетово и Штип. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука