Избор Свет

Колинда ќе се кандидира за втор мандат, вели „сега не може да ѝ сврти грб на Хрватска“

Загреб, 9. август 2019 (ОХРИДПРЕС) – Хрватската претседателка Колинда Грабар-Китаревиќ изјави дека ќе се кандидира за вториот мандат на чело на државата, изјавувајќи дека „сега не може да и сврти грб на Хрватска“, пренесе Фена.

– Секако, влегувам во кандидатура за нов претседателски мандат, а наскоро и ќе ја објавам. Но, пред тоа, сакам да работам што поголем дел од мандатниот период како претседателка – рече Грабар-Китаревиќ за „Хрватски тједник“

„Како сега би изгледало да и го свртам грбот на Хрватска  и да прифатам некои работи што ми се нудат, кои низ Европа и светот се многу поплатени, а јас да го напуштам својот хрватски народ и сопствените деца, кои иднината ја гледаат овде, објасни таа.

Таа кажа и дека се потпира, пред се, на хрватскиот народ, но дека нема да и го сврти грбот на партијата од која израснала, без разлика што во некои аспекти не се согласувала со нејзината политика, било во времето на Иво Санадер или било кој друг лидер на ХДЗ.

– Тоа што сум верна на ХДЗ не значи дека не сум му верна на целиот спектар на луѓе кои ја сакаат Хрватска – рече Грабар-Китаревиќ.

Таа истакна дека сака државата да ја врати на патот по кој тргна во деведесетите.

– Не да ја вратиме во деведесетите, туку на патот што го зацрта претседателот Фрањо Туџман, на патот на достоинството и гордоста, на патот на европејството кое нема да биде сервилно, но и на патот на политичката одлучност, ефикасност и одговорност – порача актуелната хрватска претседателка. (Крај)

извор: Плус инфо фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука

Слични објави