Охрид, 18. јануари 2021 (ОХРИДПРЕС) – Започна монтирањето на модуларната ковид болница во кругот на ЈЗУ Општа Болница во Охрид.
Болницата ќе се протега на површина од 1.000 м2 и ќе има 40 легла за пациенти опремени според највисоки стандарди.
Согласно задолженијата на кризниот штаб на Општина Охрид, општинските надлежни служби во најбрз можен рок спроведоа тендерска постапка и беше избрана фирмата „МН-АС Констракшн“ од Струга, за реализирање на градежните активности.
На просторот каде се поставуваат монтажните објекти претходно беше извршен земјен ископ, тампонирање и бетонирање на подлогата. Исто така, се постави водоводна и канализациона мрежа и се спроведоа приклучоци за електрично напојување.
Модуларната болница ќе биде опремена со целокупна медицинска опрема. Дополнителните објекти значително ќе го зголемат капацитетот на Инфективното одделение во општата болница и ќе го олеснат справувањето со здравствената криза во охридскиот регион.
Според последните официјални податоци на Министерството за здравство на Република Македонија, во ковид центарот во Охрид во моментов се хоспитализирани 45 пациенти. (Крај)
извор: ЈЗУ Општа болница Охрид фото: ЈЗУ Општа болница Охрид
