Охрид, 1. февруари 2021 (ОХРИДПРЕС) – Центарот за интегриран развој Охрид – ЦИРО ја креира првата туристичка мобилна апликација за Охрид – Discover Ohrid, во рамките на истоиментиот проект поддржан од страна на Германското друштво за меѓународна соработка ГИЗ.
Целта на проектот и самата апликација е да даде придонес во зголемување на конкурентноста и одржливоста на Охридскиот туристички секторпреку дигитализација на туристичките потенцијали и услуги. Истовремено се очекува апликацијата да ја подигне свеста за културното и природото наследство на Охрид и потребата за нивна заштита, а со вклучување на услуги од активниот туризам, угостителство и занаетчиство, поддршка се дава и на локалните бизниси што е од особено значење во кризата предизвикана од COVID-19.
Во апликацијата се опфатени над 130 обележја од интерес групирани во: 6 патеки за откривање на културното наследство на Охрид и околината, 10 патеки преку кои може да се ужива во природното наследство, над 10 понуди од областа на активниот туризам, над 30 угостителски објектии 15 работилници од традиционалното Охридско занаетчиство.
Апликацијатае двојазична (македонски и англиски јазик), патеките поврзани со културата се и со аудио водич, а поставената офлајн мапа во апликацијата овозможува патеките да се користат и без интернет конекција. Концептот на апликацијата предвидува интерактивна улога на корисникот, што се овозможува преку вклучениот систем на достигнувања и награди. Доколку корисникот комплетира некоја патека или посети одреден број знаменитости, добива награди и попусти од локалните даватели на услуги. Оваа функционалност на апликацијата ќе го зголеми ангажманот и ќе го потикне корисникот во целост да го истражи Охрид.
Тековната верзија претставува основа со многубројни можности за надградба и може понатака да се развива во стабилна платформа за севкупната понуда на Охрид како туристичка дестинација. Апликацијата е бесплатно достапна за корисниците на Андроид и ИОС платформите и можете да ја симнете на официјалната веб страна www.discoverohrid.mk. (Крај)
извор: ОхридПрес фото: архива
