Скопје, 19. мај 2020 (ОХРИДПРЕС) – Комисијата за заразни болести утре ќе разговара за тоа кога ќе се отворат угостителските објекти во државата, откако, најавата за нивно отворање во текот на оваа недела е одложено.

Министерот Венко Филипче, посочува дека собирањето на повеќе луѓе без дистанца паѓа во очи, бидејќи на таков начин државата нема да може да се избори со коронавирусот.

– Добар дел од угостителските објекти и сега можат да работат на т.н. шалтерски систем, но собирањето паѓа во очи во смисла на тоа што, голем дел граѓани не ги почитуваат мерките. Кажав на почетокот, без тоа нема да можеме да успееме. Тоа е мерка донесена со попуштање на рестрикцијата на движење. И Шпанија донела одлука за задолжително носење маски за превенција. Тоа е новата реалност и мора да се почитува. Новите случаи се семејни настани од Скопје и Тетово. Не смее да има големи масовни собири, секогаш кога има присутни луѓе, внатре мора да се носат маски, како и надвор кога нема дистанца, нагласи Филипче, јави Нова Македонија.

Во текот на утрешниот состанок, Комисијата за заразни болести, ќе расправа и за траењето на полицискиот час за време на викендот и празниците во понеделник.

Министерот за економија во Владата на Република Македонија Крешник Бектеши, на денешната прес конференција објави дека како министерство побарале да бидат отворени угостителите, но пред се’ мора да се почитуваат сите препораки.

– Ние имавме наш предлог, но крајниот збор го има Комисијата за заразни болести. Ние веќе дадовме наши сугестии и забелешки, истакна Бектеши. (Крај)

извор: Нова Македонија фото: архива