Охрид, 13. октомври 2024 (ОХРИДПРЕС) – Билтенот на СВР Охрид носи информации за пронајден кокаин во угостителски објект во Охрид, физичка пресметка и семејно насилство, сите случени во текот на изминатото деноноќие.

На 12-ти октомври 2024 година, во 02:10 часот во угостителски објект во Охрид, полициски службеници од Одделението за недозволена трговија со дрога при СВР Охрид приведоа 24-годишно лице од Скопје затоа што кај него бил пронајден кокаин. По целосно документирање на настанот, против него ќе биде поднесена соодветна пријава.

Во друг случај, на 12-ти октомври 2024 година, во 17:30 часот во СВР Охрид е пријавено дека во селото Белчишта, општина Дебрца, три лица физички, а потоа и со дрвен предмет нападнале 40-годишно лице од Охрид. По целосно расчистување на настанот, против напаѓачите ќе биде поднесена соодветна пријава.

На 12-ти октомври 2024 година, во 18:35 часот во село во општина Дебрца, полициски службеници од СВР Охрид, лишија од слобода 69-годишно лице од Охрид, кој, во викенд куќа во селото агресивно се однесувал кон членови на семејството и им се заканувал со огнено оружје. Од него одземен е пиштол „Црвена Застава“ и куршуми калибар 9 милиметри. По целосно документирање на настанот, против него ќе биде поднесена соодветна пријава. (Крај)

извор: СВР Охрид фото: ОхридПрес