Скопје/Охрид, 9. јануари 2024 (ОХРИДПРЕС) – Според податоците на Институтот за јавно здравје, во периодот од 1 до 7 јануари, во Република Македонија се евидентирани 72 нови случаи на Covid-19 во државава.
– Во овој период починало едно лице со Covid-19. Од новозаболените, најмногу се од Скопје 36, потоа Охрид со 13, Битола со седум, појасни директорот на Институтот за јавно здравје, Шабан Мемети за МИА.
Српски медиуми пренесуваат оти во Србија има тридемија, односно судир на грип, коронавирус и респираторен синцијален вирус (РСВ). Кашлање, болка во грлото, температура, омалаксаност, болки во мускулите, се најчестите симптоми на грипот, Covid-19 и респираторните инфекции од кои страдаат поголем број Срби.
– Covid-19 и неговите варијанти сѐ уште се околу нас и се повеќе циркулираат во нашите заедници, при што во моментов е детектирано „коегзистирање на три типа вируси истовремено, изјави еврокомесарката за здравство Стела Киријакидес, нагласувајќи ја потребата од помасовна вакцинација против короната и сезонскиот грип.
Киријакидес истакна дека најновите здравствени податоци укажуваат дека во некои земји членки на ЕУ, се бележи значителен пораст на лица инфицирани со коронавирусот, додавајќи дека дополнителен предизвик претставува и циркулацијата на други респираторни заболувања.
Според неа, вакцинацијата останува клучна заштита од коронавирусот, особено за ризичните категории граѓани.
– Тоа го истакнав и во писмото испратено до сите министри за здравство во септември за потребата од вакцинација против Ковид и сезонски грип. Ни треба соодветно тестирање, секвенционирање, известување и споделување на податоците за Ковидот. Тоа е единствениот начин на кој можеме да продолжиме ефикасно да го следиме ширењето на вирусите кои циркулираат и нивните варијанти и да се чуваме меѓусебно, истакна Киријакидес за „Еурактив“.
Во Хрватска во периодот од 12 до 18 декември се регистрирани 68 смртни случаи поврзани со компликации предизвикани од Covid-19, додека здравствените власти во Грција предвидуваат дека доколку продолжи сегашниот тренд на раст на инфицирани со коронавирусот, би можело да се очекуваат по околу 80 смртни случаи неделно. Во Италија во последните две недели од 2023 година, регистрирани се рекорден број заболени од сезонски грип и Ковид, додека во Белгија кон средината на минатиот месец, беше утврдено високо ниво на циркулација на коронавирусот во отпадните води и негов нагорен тренд. (Крај)
извор: МИА фото: ОхридПрес
