Охрид, 21. септември 2017 (ОХРИДПРЕС) – На Годивско поле, местото каде се планира изградбата на регионална депонија за југозападниот дел на Македонија, Координативното тело и населението на Дебрца, во сабота со почеток во 12:00 часот ќе одржи протест за стопирање на понатамошните активности за реализација на проектот.
Со цел населението на Дебрца организирано да делува во правец на спречување на изградба на таков објект на територијата на општината, на 19-ти јули 2017 година во село Годивје беше формирано Координативно тело за делување во насока на стопирање на понатамошната реализација на проектот. Овој орган е сочинет од претставници од сите триесет и три месни заедници кои припаѓаат на општина Дебрца. Аргументите кои Координативното тело ги наведе, а се во прилог на потреба од итно стопирање на овој проект, како печатен материјал беа доставени до Владата на Република Македонија, Министерството за ЖСПП, Министерството за Здравство, Министерството за Култура, Министерството за Земјоделие, Канцеларијата на ЕУ во РМ, Канцеларијата на УНЕСКО во Македонија, од каде до сега нема никаков одговор.
– Затоа, следен чекор на Координативното тело во овој процес на „комуникација“ со надлежните државни институции, е протестната манифестација која ќе ја одржиме на местото предвидено за изградба на депонијата. Уште еднаш, ние жителите на општина Дебрца, цивилизирано ќе пратиме порака до Владата на РМ, да се земат во предвид понудените и несоборливи аргументи на Координативното тело и населението на Дебрца, за стопирање на понатамошните активности за реализација на проектот. Посочуваме, дека протестната манифестација нема никаква поврзаност со претстојните локални избори и не може да биде користена за такви цели. Нудејќи цивилизирана форма на комуникација, бараме соодветно однесување и од надлежните државни институции, информираат од Координативното тело.
Регионална депонија за југозападниот дел на Македонија е проект финансиран од Европската Унија, а го изготвува грчката фирма „ЕНВИРОПЛАН С.А.“ во соработка и координација со Министерството за животна средина и просторно планирање на Република Македонија („Проект за воспоставување на интегриран самоодржив систем за управување со отпад, во пелагонискиот, југозападниот, вардарскиот и скопскиот регион“). (Крај)
извор: ОхридПрес фото: архива
