Охрид, 18. март 2017 (ОХРИДПРЕС) – Најинтересните моменти од втората аудиција на талент шоуто Ohrid SUPERSTAR ќе се емитуваат вечерва во 20:45 часот на регионалната О2 телевизија.

– Како и на првата аудиција, и втората ни донесе одлични кандидати. За да им дадеме подеднакви шанси за добро да се претстават, нашите ментори вредно работеа со нив за да се разбие тремата, но и да се подобри изведбата на песните со кои се претставија. Кандидатите се претставија во одлично светло и покажаа дека жири комисијата ќе има навистина тешка задача веќе од утре, кога почнуваат елиминациите со првата група, велат организаторите.

По утрешната, прва елиминациона аудиција, и втората која е закажана за следната недела, во текот на април се предвидени и полуфиналната вечер и големото финале. Најдобрите ќе се одбираат според гласовите на жири Комисијата и според гласањето на публиката, што ќе важи само за полуфиналната и финалната вечер.

Организаторите на шоуто обезбедија богати награди за учесниците: парична награда од 2.000 евра, снимање на песна и видео спот со Даниел Јовески и старт на Тв и Радио проект. Сите заинтересирани ќе можат да добијат дополнителни информации и на официјалната страна на Facebook.

Носители на проектот се Супер радио и охридските „Тамаро“ маркети, а главен медиумски партнер е регионалната О2 телевизија. Медиумски поддржувачи се и порталите: Ohrid1, OhridNet, OhridPres, WebOhrid, Ohrid24, StrugaOnline и Inpress, како и струшкото Плеј радио.

Доколку ја пропуштивте првата аудиција, подолу е комплетната снимка. (Крај)
извор: ОхридПрес фото: ОхридПрес