Охрид, 6. јануари 2017 (ОХРИДПРЕС) – Охридскиот продуцент, режисер и музичар Даниел Јовески го одбележа јубилејот, 5 години од неговата работа, со интересна акција, односно конкурс каде преку гласање се определија имињата на дел од македонските музичари, за кои тој ќе изработи бесплатни песни и музички спотови.

– По повод пет години од мојата успешна работа, наградена на балканско ниво, одлучив да ја освежиме македонската естрада, на тој начин што ќе направивме online гласање, на кое вие одлучувавте и изгласавте 5 македонски пејачи/групи: Перо Пандилоски, Антонио Тасески, Само Тони и две жени, Филип Божиновски и Нена Мицева, кои ќе добијат подарок по еден видео спот и песна/аудио запис. Исто одлучив и другата петка под нив да ги исконтактирам Александра Јанева, Даниел Кајмакоски, The Backdoor Band, Боби Мојсовски и Влатко Лозаноски и да им предложам еден проект за кој ако се сложат би било многу убаво за македонската музика, вели Даниел и им посакува среќни новогодишни и божиќни празници на сите и порачува „да ја негуваме македонската музика“.

Видеата изработени под режисерска палка на Јовески се прегледани повеќе од 26. милиони пати на сервисот YouTube. Покрај за македонските музичари, Даниел изработува видео спотови и за бројни уметници надвор од границите на Република Македонија, за што се закити и со награди на познати фестивали и манифестации во Албанија и Црна Гора. (Крај)

извор: ОхридПрес фото: архива