Скопје/Струга, 4. август 2023 (ОХРИДПРЕС) – Државната комисија за спречување корупцијата (ДКСК) на денешната седница соопшти дека ќе достави иницијатива до Основното јавно обвинителство Струга за кривично гонење на градоначалникот на Струга, Рамиз Мерко за злоупотреба на службената положба и овластување.

Како што посочија членовите на ДКСК, Мерко на незаконски начин на два пати назначил вршител на должност, в.д директорка на основно училиште во Струга која немала завршено високо образование, ниту го имала потребното работно искуство, јави slobodnaevropa.mk.

– Градоначалникот на општина Струга спротивно на законот на два пати ја назначил за в.д. директорка наставничката по англиски јазик, иако таа не ги исполнувала условите за тоа. Дополнително тој не го задолжил училишниот одбор да донесе одлука за објавување на јавен повик за избор на директор на училиштето. Пријавената в.д. директорка предавала предмети за кои не била стручна и за кои е потребно високо образование. Имала четири години и осум месеци работно искуство, што не е доволно за да биде назначена за директор. Дополнително во тоа време таа немала уверение за положен испит за директор, а училишниот одбор не донел одлука за распишување на јавен повик. Сето тоа го направила со фалсификувани службени исправи. Во исто време директорката сама на себе со анекс договор си го зголемила фондот на часови што е спротивно на законот. Во тоа и помагале поранешни директори. Со тоа тие ја злоупотребиле службената положба и фалсификувале слижбени исправи, рече членот на ДКСК, Шемси Салаи.

Од таму предлагаат кривично да се гонат и в.д. директорката и уште неколку други вработени, кои и помогнале да фалсификува документи кои и биле потребни за изборот на функцијата директор.

Инаку, градоначалникот на Струга, Рамиз Мерко е ставен на „црната листа“ на Соединетите Држави како генерално неподобен за влез во САД, поради како што беше кажано, негова вмешаност во коруптивни активности. (Крај)

извор: slobodnaevropa.mk фото: slobodnaevropa.mk