Охрид, 11. ноември 2024 (ОХРИДПРЕС) – Костените кои се печат на отворен оган звучат како совршена сцена од празнични филмови, но многу луѓе се прашуваат дали вреди да се подготват и дали се доволно вкусни и хранливи за да го оправдаат целиот труд.

Нутриционистички гледано, костените се сосема различни од другите јаткасти плодови, како што се бадемите или оревите. Имаат помалку калории и масти, но сепак се богати со антиоксиданси и минерали. Покрај тоа, тие се ценети поради нивната разноврсност во кујната. Може да се користат во слатки и солени јадења или едноставно да се јадат посебно. Имаат многу повеќе вода и многу малку маснотии.

Составени се од јаглехидрати кои имаат помалку калории по грам од мастите (4 наспроти 9 калории). Половина шолја костени има само 175 калории, додека, на пример, половина шолја бадеми содржи дури 414 калории. Недостатокот на маснотии во костените значи дека тие не ги даваат истите кардиоваскуларни придобивки како другите јаткасти плодови, како што е високата содржина на полинезаситени и мононезаситени масти здрави за срцето.

Сепак, вреди да се забележи нутритивниот профил на костенот. Во половина чаша костени, добивате пристојни количини на манган, минерал важен за функцијата на клетките и здравјето на коските, како и бакар, кој му помага на телото да произведува црвени крвни зрнца. Костенот содржи и витамин Ц, фолна киселина, калиум и 3,6 грама влакна, што е 13 отсто од дневната препорачана количина.

Костените се богати со антиоксиданси, а истражувањата покажуваат дека можат да помогнат во контролата на воспаленијата, да го подобрат нивото на холестерол и да го намалат ризикот од дијабетес тип 2 и заболувања на црниот дроб. (Крај)

извор: index.hr фото: index.hr