Охрид, 29. ноември 2017 (ОХРИДПРЕС) – За вторник, 5-ти декември со почеток во 11:00 часот е закажана третата седница на Советот на општина Охрид.
Пред градските избраници ќе се најдат 27 точки, меѓу кои Предлог одлуките за усвојување на нацрт буџетот и утврдување фискална стратегија и развојни програми на општина Охрид за 2018 година.
Со оглед на тоа што ни претстои зимската сезона, советниците ќе расправаат и по предлог одлуката за усвојување на оперативната програма за организирање и функционирање на зимската служба на подрачјето на Охрид, приградските и селските населби за следната година. Ќе се разгледуваат и нацрт развојните програми за одржување и заштита на локални патишта, улици и регулирање режим на сообраќај и за изградба и реконструкција на локални патишта и улици за период 2018 – 2020 година.
На дневен ред, меѓу другото, се и предлог одлуките за нацрт програмата за поттикнување на развојот на туризмот, поддршка на локалниот економски развој на општината, нацрт програмата за финансиските потреби на охридската територијална противпожарна единица и програмата за изработка на урбанистички планови на територијата на општина Охрид за 2018 – 2020 година. (Крај)
извор: ОхридПрес фото: архива
