Охрид, 2. јануари 2023 (ОХРИДПРЕС) – Делумно урнатата ограда открива дека и после четири години се’ уште не започна изградбата на двата луксузни хотели од типот на Hilton, Hyatt, или друг сличен светски бренд, како што своевремено се најавуваше покрај каналот „Студенчишта“.

На почетокот на март 2019 година, во присуство на полиција, правни застапници и ангажирана механизација започна постапката за извршувањето на имотот на ГП „Трудбеник“, кој согласно решението од судот го презеде компанијата „Фибула ер травел“.

Според договорот склучен со државата уште во 2011 година, на оваа локација „Фибула ер травел“ требаше да изгради два хотели.

За истата локација слични најави имаше и десетина години претходно, во 2009 година, кога беше потпишан и договор вреден 33 милиони долари со инвеститор од САД со македонско потекло за изградба на хотел со 5 ѕвезди на околу 15 илјади м2. Луксузниот хотел тогаш беше наречен „Окото на Охрид“, по теркот на познатиот хотел во Дубаи.

Слична судбина имаат барем уште три атрактивни локации на брегот на Охридското Езеро. Првата, веднаш до хотелот „Инекс Горица“, како хотел кој требаше да биде дел од меѓународниот ланец на хотели „Small Luxury Hotels“, втората кај поранешната Детска болница во населбата „Св. Стефан“, а секако тука е и хотелот „Палас“ во строгиот центар на градот кој е затворен од 2001 година, а од 2009 година е заштитен споменик на културата. (Крај)

извор: ОхридПрес фото: ОхридПрес