Струга, 4. јули 2019 (ОХРИДПРЕС) – Педесетина поети од земјава и странство ќе учествуваат на манифестацијата „Струшки книжевни средби“, која традиционално по 9-ти пат од денеска до 6-ти јули ќе се одржува во Струга, Охрид и Вевчани, во организација на културниот центар „Бран“ и ревијата „Бранувања“.

Настанот, како што најави организаторот, ќе почне вечер со промоција на книгата „Небесна тишина“ на Новица Соврљиќ во охридската библиотека „Григор Прличев“.

Во спомен домот на браќата Миладиновци утре ќе се одржи „Книжевна пловидба“, како и стручна работилница на тема:„Придонесот на списанијата во развојот на современата македонска литература, култура и уметност: 75 години од ослободувањето“. Во центарот за култура „Браќа Миладиновци“ предвидено е врачување на наградите „Крсте Чачански“ и „Јован Котески“ на Даниела Андоновска – Трајковска и Игор Крајчев. Ќе биде доделена и постхумно благодарница на Владо Малески за уметничкиот влог во создавањето на химната и неговиот придонес во градењето на слободна Македонија.

Поетски маратон ќе се одржи на Вевчанските извори, а ќе портрет ќе има и за добитниците на годинашната награда „Струшко слово“ Лидија Капушевска – Дракулевска, Мустафа Спахиу и Недељко Терзиќ.

На 6-ти јули во предворје на црквата Св. Ѓорѓија од Струга ќе бидат доделени наградите „Книжевна далга“ за 2019 година на Димитар Пандев, и „Бранувања“ за најдобра прочитана песна на македонски и странски автори. (Крај)

извор: ОхридПрес фото: архива