Охрид, 28. јануари 2015 (ОХРИДПРЕС) – Секторот за внатрешни работи од Охрид, во 2014 година регистрира намалување на малолетничката деликвенција и опаѓање на бројот на малолетници евидентирани како сторители на казнени дела.

Според аналитичките податоци, лани биле регистрирани 24 малолетници како директни извршители на кривични дела во Охрид, што претставува намалување во однос на 2013 година кога 31 малолетно лице биле евидентирани како извршители на кривични дела.

– Минатата година, регистрираните малолетници сториле вкупно 37 кривични дела во Охрид односно 36 во текот на 2013 година. Малолетници повторници во малолетничката деликвенција лани биле пет лица односно шест во 2013 година. Малолетниците, во 2014 година сториле 22 кривични дела ,,тешка кражба“, 10 кривични дела „кражба“, едно кривично дело „разбојништво“, две кривични дела „тешка телесна повреда“, едно кривично дело „силување“ и едно кривично дело „учество во тепачка“. Кривичните дела, најчесто ги вршат самостојно, а во помал број случаи се организираат во помали групи, информираат од СВР Охрид.

Оттаму велат дека и годинава ќе се интензивираат напорите за понатамошно намалување на малолетничката деликвенција.

– Напорите ќе бидат насочени кон поголемо ангажирање и проектни активности со ,,Локалниот совет за превенција од малолетничко претстапништво“, со образовните центри, со советодавните групи граѓани, со родителите, старателите како и останатите институции, велат од СВР Охрид. (Крај)

извор: СВР Охрид фото: архива