Охрид, 26. август 2017 (ОХРИДПРЕС) – Од денеска до 31-ви август по трет пат во селото Велестово ќе се одржи StartQube, летен камп за претприемачи и луѓе ориентирани кон градење бизнис или подобрување на своите бизнис вештини.

Учесниците ќе имаат уникатна можност, покрај одморот, да живеат со менторите на настанот во текот на целиот камп и заедно да работат на развој на бизниси според методологиите на дел од најуспешните претприемачи кои веќе го имаат тоа искуство на градење бизниси.

Годинава има ментори од Австрија и од Израел, а новина е тоа што и дел од организаторите, Здружението за развој „Стартап зона“ ќе се јават во улога на ментори. StartQube е збир на повеќе практични работилници кои се организираат во соработка со повеќе експерти.

Идејата е учесниците да се запознаат со сите фази на креирање на успешен бизнис – од изработка на бизнис план и модел, анализа на пазарот, пристап до корисниците, пристап до инвестиции, pitching, и сè што е клучно за креирање на одржлив бизнис. Оваа година учесниците ќе имаат можност и да слушнат дел од успешните бизнис приказни од Македонија и регионoт и да се запознаат со оние кои стојат зад нив. (Крај)

извор: ОхридПрес фото: архива