Бачка Топола/Охрид, 28. февруари 2017 (ОХРИДПРЕС) – Викендов во Бачка Топола, Србија, се одржа Меѓународен Таеквондо ИТФ А класа турнир Србија Опен 2017, на кој учествуваа 32 клубови од 15 земји, меѓу кои беше учесник и Таеквон-до клубот ХВА РАНГ ИТФ Лескоец-Охрид.

– Нашите натпреварувачи и покрај огромните судиски неправди, успеаја да освојат 25 медали, од кои 6 златни, 7 сребрени и 12 бронзени, и пехар за 3 место најдобар клуб. На овој турнир отидовме во најдобра форма, само две седмици пред тоа имавме семинар со еден од најдобрите мајстори во светот Гранд Мастер Ким Унг Чол црн појас IX дан, и ефектот од тој семинар се виде на овој турнир, велат од клубот.

Охридскиот клуб настапи со 15 натпреварувачи во 2 дисциплини: форми и борби.

Во категоријата форми се одржа македонско финале за јуниори, зелен појас помеѓу Давид Велковски и Антонио Јанески, кои во кокуренција од 17 натпреварувачи зедоа прво и второ место. Исто така имаше македонско полуфинале и финале на деца до 14 години жолт појас во кокуренција од 24 натпреварувачи, каде во полуфинале Климент Кузманоски го победи Филип Трифуноски, а во финале го победи и Давид Крстески кој се натпреваруваше во две категории деца до 10 години и деца до 14 години. Христијан Митрески имаше чест за него да навиваат претставници од Грција кои беа восхитени од неговата храброст и техника. Тој во кокуренција од 19 натпреварувачи во негова категорија, стигна до финале.

На овој турнир учесници имаше од Македонија, Бугарија, Грција, Србија, Романија, Унгарија, Хрватска, БиХ, Словенија, Австрија, Чешка, Словачка, Молдавија, Велика Британија, Италија.

Новиот секретар на ИТФ Мастер Ким сунг Хван лично неколку пати се поздрави и упати честитки до тренерот Марјанчо Лазаревски.

Од клубот додаваат дека учесниците биле оштетени од судиите за уште неколку медали.

– Можеме да кажеме дека на овој турнир организацијата беше со многу пропусти и беше најлошото судење досега видено на еден ваков натпревар, додаваат од клубот. (Крај)

извор: ОхридПрес фото: Хваранг ИТФ Лескоец