Охрид, 31. октомври 2024 (ОХРИДПРЕС) – Учесници во гаснењето на летните пожари во Охрид ќе добијат парични награди, одлучија Градските советници на денешната 47. седница на Градскиот совет во новиот состав.

– Општина Охрид обезбедува средства во буџетот на Општината за определување и исплата на парична награда на учесници во гаснењето на летните пожари на подрачјето на Општина Охрид. Паричната награда се определува на вкупен износ од 580.000 денари со вклучен персонален данок на доход, а ќе биде исплатена на учесници кои имаа значаен личен придонес, исклучително залагање, пожртвуваност и врвен професионализам во гаснењето на летните пожари на подрачјето на Општина Охрид, стои во одлуката.

Со ова им се оддава должна почит на сите кои учествуваа во акциите за гаснење на пожарите. Пред се’ на професионалните пожарникари од Територијалната противпожарна единица (ТППЕ) од Охрид, локалното Доброволно противпожарно друштво „Ентузијаст“, како и Доброволното противпожарно друштво „Повардарец“ од Неготино, но и бројни останати волонтери со логистичка поддршка од погранична полиција, вработени во НП „Галичица“ и останати лица и служби од Охрид, околината и целата држава, кои учествуваа во гасењето на пожарите во околината на Охрид во текот на август годинава.

Најзафатени беа регионите кај Илинска планина и на Галичица, за што, покрај екипите на терен, се користеа и воздухопловите со кои располага државата – авионите Air Tractor, како и хеликоптерите на полицијата и летала од соседството, кои пристигнаа во помош за да се изгаснат пожарите. (Крај)

извор: ОхридПрес фото: ОхридПрес