Скопје/Охрид, 26. ноември 2024 (ОХРИДПРЕС) – Јавното претпријатие за државни патишта (ЈПДП) презема активни мерки за намалување на бројот на возила кои избегнуваат плаќање на патарина, и во таа насока во соработка со Министерството за внатрешни работи и Инспекторатот за транспорт и сообраќај изминатиов период беа организирани 13 контролни акции.

– Инспекторите за транспорт со асистенција од МВР спроведоа контроли на наплатните станици Гостивар, Тетово, Желино, Петровец, Миладиновци и Отовица при што беа изречени мандатни казни од по 200 евра на сите кои се обиделе да избегнат плаќање на патна такса. Напоменуваме дека и во периодот што следи ќе продолжиме со зајакнати контроли на наплатните станици на Коридорите 8 и 10. Воедно, побарана е поголема ангажираност и од страна на стручните служби, поточно од контролорите во Контролниот центар, за преземање на поактивни мерки за намалување на бројот на возила кои избегнуваат плаќање на патарина, како и процесирање на избегнувањето плаќање преку соодветно фактурирање и достава на фактури за ненаплатена патарина до корисниците на автопатски услуги кои не плаќаат патарина, информираат од ЈПДП. (Крај)

извор: ОхридПрес фото: архива