COVID-19 Здравје Избор Македонија ТОП ВЕСТИ

Филипче: Фотографиите од вчерашното празнување во верските храмови се загрижувачки, коронавирусот ниту е мртов ниту е заминат

Скопје, 25. мај 2020 (ОХРИДПРЕС) – Фотографиите и прилозите од вчерашното празнување во верските храмови и пред нив се повторно загрижувачки, напиша на неговиот официјален профил на Facebook министерот за здравство д-р Венко Филипче.

– И покрај апелите на здравствените институции да нема масовни собирања, да се почитуваат мерките за држење дистанца и ограничувањето на движењето, тоа не се случи. Го почитувам празнувањето и силно верувам дека тоа се значајни настани за сите нас, независно на која вера припаѓаме. Но, оваа година празниците во целиот свет се празнуваат на еден поинаков начин, ставјаќи го сопственото здравје и на нашите сограѓани пред се’ и над се’. Им благодарам на граѓаните кои се придржуваат кон мерките, а кои за жал, понатаму можат да бидат изложени на ризик поради оние коишто тоа не го прават. Коронавирусот ниту е мртов ниту е заминат. Тој е тука и за жал, проблемот ќе се провлекува се додека има такви кои го ингнорираат. Многу пати повторив, но еве уште еднаш ќе кажам. Здравствените работници не можат сами. Мерките се добри и навремени, но тие функционираат само ако се почитуваат, во спротивно немаат ефект. Почитувањето на мерките и ефектите од нив зависат само од нас како граѓани. Едноставно мора да се прифати новиот начин на живот, мора нашето секојдневие да го прилагодиме почитувајќи ги препораките, порача министерот Филипче. (Крај)

извор: ФБ Венко Филипче фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука