Избор Охрид Партии ТОП ВЕСТИ

Левица Охрид: Колкава е безбедноста на пешаците во охридскиот сообраќај?

Охрид, 22. ноември 2020 (ОХРИДПРЕС) – Тротоарите во Охрид веќе се претворени во паркинзи за возила. Тоа, секако го отежнува движењето на пешаците, кои наместо на тротоар, приморани се да се движат по коловозите. Ова, особено претставува голем проблем пред влезот на училиштата, каде, секако, загрозена е безбедноста на децата, реагираат од локалниот огранок на партијата Левица од Охрид.

-Се обидовме да добиеме информации од охридската полиција, зошто не се интервенира барем пред училиштата и не се отстрануваат возилата на несовесните возачи, но ни беше одговорено дека полицијата немала нови тарифи за казни, а пајак службата интервенирала само ако биле во близина и ако пајакот бил во исправна состојба. Додека полицијата ги добие новите тарифи за казнување, останува секој пешак да стравува за својата безбедност, а секој родител да стравува за безбедноста на своите деца. Се надеваме, во име на безбедноста на пешаците и децата во училиштата, началникот на СВР Охрид ќе се потруди тоа да го среди во најбрз можен рок. Дотогаш охридската полиција ќе ги „лови“ и казнува граѓаните кои не носат маски и ќе удри и по нивниот ионака тенок буџет, а пешаците ќе се снаоѓаат некако, со надеж дека што поскоро ќе им биде овозможено нормално и безбедно движење, реагираат од партијата. (Крај)

извор: Левица Охрид фото: Левица Охрид

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука