Охрид, 23. јануари 2022 (ОХРИДПРЕС) – Со внимание ја проследив онаа провладина хајка и разглобувањето до најситните детали околу моето тестирање за ковид, надополнето со многу политика, реагира Градоначалникот на Охрид д-р Кирил Пецаков, откако денеска од СДСМ го обвинија дека треба да одговара за непочитување на здравствените протоколи и свесно ширење зараза.
– Веројатно тезата „Наќе е крив“ сега е заменета со акцијата „Пецак е крив“, а сето ова само тие од власта да не бидат криви на кои им се случи геноцид на народот поради неспособност во справувањето со ковид заразата. Им благодарам за вниманието, а аналогно на тоа јас ќе посветам внимание на фактите кои се следни. На 19-ти јануари, ден Водици се тестирав во Центарот за јавно здравје Охрид, не поради чуствување на симптоми поради Covid-19, туку поради патување (уплатено од 20-23 јануари) и потребата за поседување на негативен PCR тест. Нормално не бев во изолација, затоа што што би се случило доколу илјадници луѓе кои поради потребата за патување во странство би се изолирале чекајќи резултати и секако не постои ниту еден пример кој се изолирал додека чекал резултати на PCR тест за странство, така што јас во текот на тој ден бев со охриѓани кои го славеа големиот христијански празник, реагира Пецаков.
Тој додава дека истиот ден, како и кај секој тестиран, на мејл околу 17:00 часот (а го прочитав покасно) добив известување од тестирањето кое кажуваше дека имам позитивен тест и иако не чуствував никакви симптоми превземав мерки за самоизолација, додека мојата сопруга имаше негативен тест.
– Наредниот ден (четврток) експресно добив решение за изолација од инспекторката од ДСЗИ, бидејќи без симптоми 10 дневна изолација, да појаснам сте имале можност да видите и лично, најголем дел имногу покасно, а се случувало и да не добијат решение за изолација. После 36 часа од тестирањето, со оглед на тоа што немав никакви симптоми, ниту некој од моето опкружување се тестирав уште еднаш, при што се покажа дека тестот е негативен и немам присуство на корона вирус (и тој тест јавно го објавив), и само што ги добив резултатите истите и ги испратив на инспекторката (иако во некој друг процес кај што е започнато креирањето на кривичната пријава, вели дека не била запозната за тие резултати). Стана јасно дека станува збор за грешка во тестирањето или пак кујните на власта по своја потреба тоа така го фабрикуваа. Да одговорам и на обвинувањата упатени до мене од Ирина Бухова, директорката на Државниот санитарен и здравствен инспекторат. Не сум прекршил ниту еден протокол, ниту свесно сум предизвикал опасност за граѓаните на Македонија. Вие и оној политички менаџмент во ДСЗИ ќе се соочите со кривична пријава за клевети и несовесно работење и изнесување на заштитени (здравествени) податоци во јавност преку вашите политички портали. Воедно Ве повикувам наместо да се занимавате со мене и со охриѓани, да посветите внимание на колапсот во здравството и непособноста да се справите со пандемијата. Вашите грешки чинат животи, а неспособноста на власта Охрид го чини катастрофални резултати во туризмот, реагира првиот човек на Охрид, Градоначалникот д-р Кирил Пецаков.
Од СДСМ денеска побараа Пецаков да одговара за непочитување на здравствените протоколи и свесно ширење на зараза. Партијата го оцена однесувањето на градоначалникот како скандалозно и крајно неодговорно.
– Наместо во изолација како што му било одредено, додека го очекувал резултатот од тестот за Covid-19, градоначалникот на Охрид се појави помеѓу охриѓани за Водици и ги стави во опасност сите присутни. Без маска и без никакво почитување на протоколите, Пецаков се ракуваше со граѓани, сопартијци и амбасадори. Ова не е само непочитување на одредбите и законите, ова скандалозно однесување на Пецаков е непочитување на граѓаните, на охриѓани, но и непочитување на лекарите и медицинските лица, истакна на денешната прес-конференција портпаролката на СДСМ Богданка Кузеска.
Таа посочи дека Пецаков на прославата за Водици во Охрид бил заедно со лидерот на ВМРО-ДПМНЕ Христијан Мицкоски и праша зошто Мицкоски молчи за ова скандалозно однесување на Пецаков и дали ќе го повика на одговорност или ќе го штити. (Крај)
извор: ОхридПрес фото: архива
