Охрид, 9. септември 2022 (ОХРИДПРЕС) – Во просториите на Касарна Хаб – поранешната Касарна, на улицата „Радојца Новичиќ“ бб во Охрид, денеска од 18:00 часот ќе се одржи презентација на тема „Метаверзум – судир на реалности и раѓање на нов свет“ со проф. д-р Анис Сефиданис.
– Приклучете ни се во имерсивното предавање за потеклото, придобивките и предизвиците на новата парадигма на живеење наречена Метаверзум. Од визијата на Кругер, преку архитектурата и типологијата на виртуелната реалност, до најновите технологии и платформи за целосно потопување на човекот во новиот хибриден свет, информираат организаторите.
Касарна хаб е стартап центар, како дел од проектот OHRID GO, чии спроведувачи се Општина Охрид и Стелар Солушнс. Во следните две години во Касарна Хаб планирани се низа настани, едукации, менторства и вмрежување на лица кои имаат идеи за иновативни бизниси со потенцијални инвеститори.
Проф. д-р Анис Сефиданис предава на Факултетот за применети информатички науки, машинска интелигенција и роботика при Универзитетот за информатички науки и технологии „Св. Апостол Павле“ во Охрид. Тој е автор на четири книги од областа на IT, меѓу кои „Препознавање на облици со помош на вештачка интелигенција“ и основач на Центарот за вештачка интелигенција кој во нашата држава го донесе првиот Суперкомпјутер на компанијата NVIDIA. (Крај)
извор: ОхридПрес фото: архива
