Се’ е подготвено за седмото издание на фестивалот на краток филм „Drim Short“

Струга, 10. август 2023 (ОХРИДПРЕС) – Од 14-ти до 17-ти август 2023 година, Струга ќе биде домаќин на седмото издание на фестивалот на краток филм „Drim Short“.

– Ако филмот е естетска креација, плод на колективен уметнички труд од различни умови, тогаш фестивалот е естетско-тематски собир, плод на подредувањето во универзумот кое овозможува многу различни умови, својот колективен труд наречен филм, да го презентираат на исто место, во исто време, создавајќи момент на магична илузија, необјасниво чувство на посебност за публиката и можност за размена на вистински вредности што остануваат врежани во колективната меморија. Денес, кога околу нас видливо недостасуваат едноставност, разбирање и мир, среќни сме што со специјалните мали нешта, наречени кратки филмови, придонесуваме во разубавување на времето во кое живееме. Кога светот е во опасност, убавината ќе го спаси. Кога реалноста натежнува, неопходна е убавина. Со нашето седмо издание, под мотото „Неопходна убавина“ ќе посакаме нашиот фестивал да биде само еден од многуте културни блесоци кои денес ни недостасуваат, порачуваат организаторите.

Додаваат дека фестивалската програма и оваа година ќе биде распределена во четири фестивалски денови, со филмови во натпреварувачки категории и тоа регионална, меѓународна, студентска и специјална програма „Соочување со минатото“, во селекција на нивниот долгогодишен соработник, режисерот Иван Бакрач.

– Покрај натпреварувачките програми, фестивалот ќе ја претстави специјалната програма „MK Special” со цел промоција на македонскиот филм и младите македонски автори. Гостинските програми оваа година се плод на соработка со „DocuFest“ од Косово и „Sarajevo Film Festival“ од Сараево. Оваа година, во соработка со Еко-Свест ќе претставиме и ревијална програма на филмови чија главна тема е екологијата и заштитата на животната средина. Неизбежен сегмент од целиот фестивал повторно ќе биде едукативниот дел, пропратен со ексклузивен мастерклас со реномираниот ирански режисер Али Ашгари. Во рамки на фестивалот ќе бидат одржани две дискусии. Првата ќе биде на тема „Соочување со минатото“ во соработка со нашите партнери Форум ЗФД Скопје, на која ќе учествуваат филмски уметници од регионот. Втората дискусија во соработка со Еко-Свест ќе биде на тема заштита на животната средина и пред сѐ Охридското Езеро, а учество ќе земат екологисти и преставници на институциите. „Drim Short“ по втор пат ќе биде домаќин на работилницата за краток филм „Fund Ready“, како дел од регионалната мрежа на фестивали за краток филм Balkan Short Film Network. Во музичката OFF програма, оваа година ќе настапат Фолтин, милениците на струшката публика, Rootboy со музичка селекција за капење на Дрим и за затворање на фестивалот диџеите Diah и Бодан Јамакоски, потенцираат од „Drim Short“.

Влезот за сите настани е бесплатен. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука