Скопје/Охрид, 10. октомври 2023 (ОХРИДПРЕС) – Во претстојниот период следува активна туристичка промоција на Република Македонија која е во фокусот на новинари, промотори, блогери, телевизиски екипи од Јужна Кореја, Шпанија, Италија и Црна Гора.
Од утре во земјава претстојува Андреј Ким и претседателот на „Hyundai Motor Group“, Еуисун Чунг од Јужна Кореја, кои во соработка со надлежни институции од земјава го поддржуваат патувањето на јужнокорејската актерка, Хан Хјо-Жу, која скоро се појави во популарниот Disney+ телевизиски канал, во серијалот „Moving“.
Во формат на патувачки дневник преку видеа ќе ги истражуваат убавините на Република Македонија и ќе споделуваат оригинални приказни и искуства од земјава. Со цел за зајакнување на односите помеѓу двете земји, Чунг го поддржува развојот на туристичката индустрија на Република Македонија со претставување на оваа прекрасна земја низ целиот свет преку медиумско известување, особено до оние во Азија кои се заинтересирани да ги истражуваат земјите кои се малку познати на јавноста, а кои се посетувани од познати ѕвезди.
За светската јавност доволно интригантен е Хуан, репортер и патувачки инфлуенсер од Шпанија кој со неговото куче Мигас го патува светот. Авантурата ја започнаа од Шпанија, патуваа низ Турција, а исто така ќе поминат низ Франција, Италија, Словенија, Хрватска, Црна Гора, Албанија, Република Македонија и Бугарија. Важно е да се напомене дека нивните документирани авантури ќе се прикажуваат на La 2 шпански телевизиски канал управуван од „Televisión Española“, телевизиски оддел на државниот јавен радиодифузер „Radiotelevisión Española“ и ќе се емитуваат на канали низ целиот свет. Хуан со Мигас ќе дојде во Скопје на 16-ти oктомври и ќе снимаат на локации низ Скопје, Битола, Охрид и Тиквешкиот регион. Ова информативно патување ни е од посебно значење за промоција на македонските туристички потенцијали на шпанскиот пазар кој е значаен за туристичкиот бизнис сектор.
Овој месец ги очекуваме и новинарите од Радио телевизија Црна Гора кои ќе ги посетат Скопје и Охрид и ќе ги снимаат и промовираат природните и културините убавини на регионот. Туристичките врски помеѓу Црна Гора и Република Македонија се од големо значење за промоција на Балканот како една дестинација за трети земји.
Во најава е информативно патување за претставници од „Pandataria Film“, продукциска куќа која работи за RAI – Radiotelevisione italiana национален јавно радиодифузен сервис на Италија. Екипа од емисијата Килиманџаро ќе го посети Скопје во рамките на серијалот Европски престолнини. Килиманџаро е телевизиска програма што се емитува секоја недела попладне на националниот ТВ канал RAI 3 која содржи документарни патувања снимени во сите делови на светот. Во текот на програмата дефилираат и ликови од филмот или од светот на културата. Програмата е присутна од 1998 година и досега е една од најпопуларните ТВ-програмски станици во Италија и пошироко. Килиманџаро има публика од 3 милиони гледачи на возраст од околу 35/50 години.
Реализација на информативните патувања кои се дел од програмските активности на Агенцијата за туризам се одлична алатка за промоција на најубавото и најавтентичното од земјава, со цел поголема видливост на Република Македонија како туристичка дестинација. Искуството на гостите раскажано преку репортажи, прилози, телевизиски емисии, блогови е непроценливо богатство за сите кои сакаат да ја посетат земјава.
– Да им ја доближиме традицијата која е дел од нас и го оживува минатото, да дозволиме да го почувствуваат најубавото од земјава, да ги пречекаме со насмевка, да ја доживеат македонската гостопримливост, да бидат дел од приказна која вреди да се раскажува, велат од Агенцијата за промоција и поддршка на туризмот на Република Македонија. (Крај)
извор: ОхридПрес фото: архива
