ЈП „Охридски комуналец“: Повлечени контејнерите од Грашница, граѓаните да не депонираат отпад на оваа локација

Охрид, 24. октомври 2023 (ОХРИДПРЕС) – ЈП „Охридски комуналец“ ги повлече контејнерите од Грашница што беа наменети за комунален отпад од плажите Канео и Лабино.

Од претпријатието додаваат дека контејнерите ги поставиле за полесно справување со комуналниот отпад што се создавал на тешко пристапните плажи, но несовесни поединци ги злоупотребувале за депонирање на секаков вид отпад.

– Контејнерите беа злоупотребувани за депонирање на секаков вид отпад од околното население, посебно кабаст отпад и градежен шут, деградирајќи го овој простор, злоупотребувајќи ја намената на контејнерите и нашите напори за подобро справување со отпадот од тешко пристапните плажи, велат од претпријатието.

Оттаму апелираат до граѓаните да не депонираат комунален отпад, кабаст и зелен отпад и градежен шут на оваа локација. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука