Акција „Синџир“ во Охрид, Неготино, Кавадарци и Битола: Определени 13 ефективни притвори, еден куќен притвор и 12 мерки на претпазливост

Скопје/Охрид, 31. октомври 2023 (ОХРИДПРЕС) – Од Кривичниот суд потврдија дека се прифатени барањата од Основното јавно обвинителство за гонење на организиран криминал и корупција и определени се 13 ефективни притвори, еден куќен притвор и 12 мерки на претпазливост во врска со осомничените во случајот „Синџир”.

Во акцијата „Синџир“, што се спроведуваше вчера на повеќе локации во Охрид, Неготино, Кавадарци и Битола, опфатени се 26 физички и 28 правни лица кои се сомничат за злосторничко здружување, даночно затајување и за перење пари.

Од Основното јавно обвинителство за гонење на организиран криминал и корупција вчера информираа дека при извршените претреси обезбедена е дополнителна документација која ќе биде предмет на обработка.

Приведени се 20 осомничени лица од Охрид, Неготино, Кавадарци, Битола и Скопје, а шест лица се недостапни на органите на прогонот.

– Осомничените со сите противправно преземени дејствија, во име и за сметка на кривично одговорните правни лица во нивна сопственост и управување, не пресметале и не платиле данок – давачка на која биле законски обврзани. На овој начин, со намера за себе да се стекнат со противправна имотна корист, осомничените предизвикале штета на Буџетот на Република Македонија во вкупен износ од 490.808.618,00 денари или 7.980.627 евра, наведе Обвинителството во вчерашното соопштение.

Воедно, како што посочија од Обвинителството, во временскиот период од 22.10.2020 до 31.12.2021 година, во Неготино, Струмица, Скопје, Штип и во Велес тројцата организатори на злосторничкото здружение и четири осомничени припадници на злосторничкото здружение со цел да го прикријат потеклото на паричните средства и нивното движење, пуштиле во оптек, примиле пари и извршиле пренос на парични средства и подигале парични средства во готово во вкупен износ 40.046.815,00 денари или 651.168 евра за кои знаеле дека се прибавени со кривично дело Даночно затајување. (Крај)

извор: Канал 5 фото: Канал 5

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука