Младите таленти од ООМУ „Методи Патче“ ги изведоа безвременските композиции од анимираните филмови на „Дизни“ на Новогодишниот концерт

Охрид, 27. декември 2023 (ОХРИДПРЕС) – Младите музички таленти од ООМУ „Методи Патче“ од Охрид приредија прекрасно музичко уживање со безвременските композиции од најпознатите анимирани филмови на „Дизни“ на вчерашниот Новогодишен концерт.

На различни инструменти, под менторство на своите професори, преку индивидуални и групни настапи, учениците интерпретираа дваесетина музички теми. Многубројната публика уживаше во мелодиите од „Снежана“, „Заспаната убавица„, „Кралот Лав“, „Аладин“, „Фрозен“, „Пепелашка“ и други препознатливи екранизирани бајки.

Концертот беше инспириран од јубилејот 100 години од основањето на студиото „Дизни“ со чии ликови, приказни и музика растеа и растат низа генерации.

Во пресрет на новогодишните празници, учениците од ООМУ „Методи Патче“, утревечер на 28-ми декември 2023 година ќе одржат Новогодишен концерт и на Градскиот плоштад „Свети Климент Охридски“ со почеток во 18:00 часот. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука