Светски ден на радиото: Супер радио ја држи магијата жива и понатаму останува водечки медиум во регионот

Охрид/Скопје, 13. февруари 2024 (ОХРИДПРЕС) – Под покровителство на УНЕСКО, денеска по 13. пат се прославува Светскиот ден на радиото.

Целта е да се подигне свесноста за значењето на радиото меѓу јавноста и медиумите, да се охрабри вмрежувањето и меѓународната соработка меѓу радиодифузерите и да се промовира пристапот до информациите и слободата на изразување преку брановите на овој медиум.

– Темата на Светскиот ден на радиото во 2024 година е извонредното минато на радиото, релевантната сегашност и ветувањето за динамична иднина. Со нетрпение го очекуваме следниот век на радиото. Доаѓа во погодно време, бидејќи радиото, иако статистички популарно и има огромна доверба во јавноста, се соочува со зголемени предизвици за публиката и дигиталните платформи, продорните социјални медиуми, дигиталните и генерациските јазови. Одбележувањето за 2024 година ги нагласува: неизбришливата историја на радиото и неговото моќно влијание врз вестите, музиката, спортот, неговата вредност како бесплатна јавна мрежа за време на итни случаи и прекини на електрична енергија предизвикани од природни и човечки катастрофи како што се бури, земјотреси, поплави, топлина, шумски пожари, несреќи и војни, континуираната демократска вредност да служи за поврзување на помали групи, вклучувајќи ги имигрантските, религиозните, малцинствата и населението погодено од сиромаштија. Станува збор за извонредно достигнување за масовна комуникација и тоа треба да ја продолжи својата релевантност во следните 100 години и да остане сила за слобода на изразување. Додека гордо ја раскажуваме неговата приказна, да ја поздравиме иднината на радиото во следниот век, стои во пораката на УНЕСКО.

Радиото, како универзален медиум кој досега до различни заедници и маргинализирани групи, нудејќи притоа забава, едукација, користење на правото на слобода на изразување, јавни дебати, е составен дел од секојдневието на многумина.

Со развојот на интернет и мобилните технологии уште повеќе се зголемуваат неговите досегашни можности. Радиото и понатаму успева да се адаптира на ритамот на општествените и технолошките трансформации, но и на потребите на слушателите.

Охридското Супер радио минатата година го прослави 31. роденден и останува препознатлив медиум по обработката на програмата, маркетинг сегментот, музиката, но и со комплетна забавна, информативна и спортска програма.

Со просечен неделен досег од 17,6% и дневен од 10,3 %, охридското Супер радио и понатаму останува водечки медиум во својот регион и еден од најпопуларните во Република Македонија. Станува збор за една од најстарите радио станици во државата и е на врвот на слушаноста од почетокот на објавувањето на официјалните рејтинзи на некогашниот Совет за радиодифузија на Република Македонија (сега АВМУ).

Потврда за работата на радио станицата дојде и од локалната заедница, со доделувањето на Св. Климентовата повелба за досегашната успешна работа и придонес за градот. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука