Берлин/Охрид, 6. март 2024 (ОХРИДПРЕС) – Охридскиот тур оператор DMC Balkans & Europe е прогласен за најдобар тур-оператор во Република Македонија на 31-то доделување на World Travel Awards на манифестацијата која се одржа во Ritz Carlton хотелот во Берлин.

– Го направивме тоа повторно. Огромна благодарност до Бога и моето неверојатно DMC Balkans & Europe семејство. Вашата посветеност, страст и напорна работа уште еднаш не доведоа до престижната титула Најдобар тур-оператор во Македонија на 31-то доделување на World Travel Awards. Ова признание, објавено за време на големиот настан на ITB Berlin, не е само победа за нас, туку и почит на нашата љубов кон Македонија и волшебниот Охрид. За оваа прекрасна земја и нејзините приказни се стремиме, се бориме и ги вложуваме нашите срца во она што го правиме, порача Филип Стефаноски, главниот „виновник“, кој стои зад приказната DMC Balkans & Europe.

Тој додаде дека секоја турнеја што ја организираат, секој патник што ќе го сретнат и секоја приказна што ја споделат ги доближува до презентирањето на вистинската суштина на Македонија.

– Оваа награда е доказ за нашата посветеност и ја поттикнува нашата желба да продолжиме да нудиме незаборавни искуства. Ви благодариме на сите што сте дел од нашето патување. Ова достигнување е ваше колку што е наше. Да продолжиме да ја славиме нашата земја и да ја шириме љубовта кон Охрид надалеку. За уште многу достигнувања и континуиран успех, потенцираше Стефаноски. (Крај)

извор: ОхридПрес фото: DMC Balkans & Europe