Охрид, 12. март 2024 (ОХРИДПРЕС) – Од партијата Левица излегоа со обвинување дека МВР, ОЈО и градоначалникот на Охрид Кирил Пецаков веќе трет ден молчат за дивоградбата која ја гради Нефи Усеини во центарот на Охрид и од која е отстранета плочата од времето на Народноослободителната борба.

– Ова е историската куќа во Охрид, каде Нефи Усеини ја гради својата дивоградба и насилнички ја тргна антифашистичката табла за осудените борци на НОБ. Веќе трет ден Кирил Пецаков, Градоначалник на Општина Охрид молчи за отстранетата плоча која се однесува на бугарскиот фашистички окупатор. Пецаков молчи со месеци пред дивеењето на Нефи, кој го уништи ликот на оваа куќа од историско значење. Вака ли ДПМНЕ ја штити антифашистичката историја на македонскиот народ? За потсетување: Националната установа Завод и Музеј нема дадено позитивно мислење за терасите и доградбите кои се дивоградби; Општината нема дадено решение; Градежниот инспектор во август донел Решение за отстранување на доградбите, а инвеститорот Нефи ја отстранил жолтата лента и продолжил со градбата; ОЈО отворило истражна постапка, но уште нема во јавност информација дали е поднесен обвинителен акт за бесправно градење?! – стои во реакцијата.

Од Левица додаваат дека полни 8 месеци ниту МВР, ниту ОЈО, ниту Пецаков, ниту Министерството за култура не можат да го спречат Усеини од редовите на ДУИ во уништувањето на еден историски споменик од антифашистичката борба.

– Додека беседат за европска иднина и колку се посветени на патот за ЕУ, буквално една тераса не можат да срушат. Нели Пецаков ветуваше дека ќе стави крај на дивеењето на познатиот локален шериф? Прашањето е едноставно: за колку пари е купен молкот? – стои во партиската реакција. (Крај)

извор: Левица фото: Левица