Матески: Бараме исплата на платите, имаме проблем и со недостаток на вработени од технолошкиот процес во Поштата

Охрид, 18. март 2024 (ОХРИДПРЕС) – Вработените во Македонска Пошта денеска протестираат во периодот од 08:00 до 10:00 часот и бараат исплата на платата за минатиот месец и решение за состојбата во поштенското претпријатие.

Протест утрово се одржа и пред Дирекцијата на охридската подружница, каде преставникот на Синдикатот на Македонска пошта Тони Матески, за Супер радио и OhridPress истакна дека станува збор за револт затоа што каснат платите.

– Надминат е законскиот рок за исплата од 15-ти во месецот. Денеска сме 18-ти, а ние немаме се’ уште земено плата. Тоа е основното барање, но не помалку се значајни и другите барања кои досега не се воопшто реализирани, а се договорени во спогодни што ги склучи менаџерскиот тим со синдикатите на пошта. Ова значи понатамошно продлабочување на кризата и доколку до овој момент имавме проблем со исплата, сега веќе во последно време имаме и проблем со вработени, односно немаме доволно вработени за извршување на технолошкиот процес. Како резултат на тоа имаме зголемување на администрацијата и намалување на вработените од технолошкиот процес, што дополнително ја отежнува работата, истакна Матески.

Тој додаде дека доколку не се исполнат барањата, можно е да се донесе одлука за штрајк, но за тоа дополнително ќе ја известат јавноста. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука