Сиљановска Давкова во ДИК го доби Уверението за нов Претседател

Скопје, 11. мај 2024 (ОХРИДПРЕС) – Државната изборна комисија денеска и’ го издаде Уверението за избран Претседател на Гордана Сиљановска Давкова, која според резултатите од спроведените избори, одржани на 24-ти април (прв круг) и 8-ми мај 2024 година, беше избрана за Преседател на државата.

Државната изборна комисија утврди дека вкупниот број на запишани избирачи за претседателските избори кои биле запишани во Избирачкиот список изнесува 1.814.317, вкупниот број на избирачи кои гласале бил 861.218, вкупниот број на неупотребени гласачки ливчиња 953.121, вкупниот број на важечки ливчиња 812.899, вкупниот број на неважечки ливчиња 48.289 а процентот на избирачи кои гласале е 47.47%.

На гласањето по листите за кандидат за Претседател на Република Македонија, во законски утврдениот рок, по истекот на рокот определен за приговори на постапката за гласање, сумирање и утврдување на резултатите и објавените првични резултати, Државната изборна комисија ги објави и следните конечни резултати:

1. Стево Пендаровски, освоени 251.899 гласови
2. Гордана Сиљановска Давкова, освоени 561.000 гласови

За Претседател е избрана Гордана Сиљановска Давкова со мнозинство гласови од избирачите кои гласале.

Претседателот на ДИК, Проф.Др. Александар Даштевски и го предаде Уверението на Гордана Сиљановска Давкова и од име на Комисијата и посака успешен мандат како шеф на државата. (Крај)

извор: МИА фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука