Со секое доаѓање е се’ поубав и поубав, Св. Наум денеска (Фото)

Охрид, 13. мај 2024 (ОХРИДПРЕС) – Има места кои со секое доаѓање и посета, како да стануваат се’ поубави и поубави.

Едно од нив, секако е и Манастирскиот комплекс Св. Наум, место кое плени со својата древност и убавина.

Се наоѓа на околу 30 километри од Охрид, опкружен со неповторлива природа, помеѓу бескрајното синило на езерото и високиот планински масив на Галичица. Стои како сведок на средновековието и зрачи со убавина, култура, историја и традиција. Најубавиот дел од комплексот е прекрасната црква од камен и тули со форма на впишан крст.

Св. Наум Охридски, современик на Св. Климент Охридски и еден од најзначајните ученици на Св. Кирил и Методиј, бил познат по својата чудотворна исцелителска моќ. Тој ја подигнал црквата посветена на Светите Архангели Михаил и Гаврил, во 9 век. Во 910 година, по смртта, Св. Наум бил погребан во малата капела во црквата која е украсена со импресивни фрески што ги прикажуваат неговиот живот и чуда. На столбовите има остатоци од натписи на глаголица и на кирилица од 10 век, што се сведоштва за почетоците на словеската писменост.

Во времето на турското владеење, црквата била целосно разурната. Денешната црква била изградена во периодот помеѓу 16 и 17 век врз темелите на старата црква. Сегашните фрески на ѕидовите на црквата биле насликани во 1806 година. Интересен елемент во црквата е и нејзиниот иконостас во позлатена резба, изработен во 1711 година, заедно со повеќето икони.

Во манастирот „Св. Наум“ доаѓаат бројни намерници да го посетат гробот на светителот. Тоа е засолниште за болните, особено за оние со душевни болести. И денес, кога ќе ставите уво на неговиот гроб, се слуша чукањето на неговото срце.

Манастирот го красат и преубавите пауни или рајски птици кои се сметаат за симбол на христијанството и кои ги има во изобилство. Велат дека нивните крикови се слушаат дури до изворите на Црн Дрим. Толку многу убавина на едно место. Тука сигурно ќе го пронајдете својот духовен мир… (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука