Скопско организира голема ЕКО-Акција на плажа „Дебрца“

Охрид, 23. мај 2024 (ОХРИДПРЕС) – Во организација на Скопско, во сабота, на 1. јуни 2024 година, ќе се одржи голема ЕКО-Акција за чистење на Охридското Езеро, нашето непроценливо природно богатство кое заслужува целосна заштита и грижа.

– Оваа акција ќе се одржи на 1-ви јуни на плажата „Дебрца“ (стар пат Охрид-Струга, во близина на реката Сатеска), и претставува одлична можност за сите граѓани, семејства и пријатели да се здружат во заедничката мисија за почиста животна средина. Охридското Езеро, со својата извонредна природна убавина и значење, е симбол на нашата гордост и културно наследство. Заедно, можеме да придонесеме за неговото зачувување и да оставиме траен белег на нашите напори за одржлива иднина. Оваа иницијатива е дел од во рамки на долгорочната платформа за општествена одговорност „Наша гордост. Наша одговорност.“ со која сакаме да го подигнеме нивото на свест за важноста на зачувување на нашите природни обележја кои не само што се наша гордост, туку се и наша одговорност, порачуваат организаторите.

Акцијата ќе започне во 10:00 часот, а сите заинтересирани за учество можат да се пријават со пополнување на формуларот.

Скопско обезбедува превоз за сите учесници од Скопје до Охрид и назад, освежување и храна, опрема за чистење – ракавици, вреќи за отпад и други материјали.

– Преку оваа акција се инвестираат средствата што беа собрани во првата фаза од CSR кампањата (од секое продадено Скопско пиво во стаклена амбалажа издвојуваме по еден денар во акции за чистење на Охридското Езеро). Вашето присуство и поддршка се од клучно значење за успехот на оваа акција. Ова е можност да се обединиме и заедно да ја покажеме нашата одговорност кон природните обележја и идните генерации. Придружете ни се, порачуваат од Скопско. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука